சமையல் குறிப்புகள்! பேரீச்சம்பழ பாயசம்.

தேவையானவை பேரீச்சம்பழம் (கொட்டை நீக்கியது) - 1 கப் தேங்காய்ப் பால் - 1 கப் வெல்லம் நறுக்கியது - 1/4 கப் ஏலக்காய்த் தூள் - 1 சிட்டிகை பச்சைக் கற்பூரம் - 1 சிட்டிகை உப்பு - 1 சிட்டிகை செய்முறை * கொட்டை நீக்கிய பேரீச்சம் பழத்தை பொடிப் பொடியாக அரிந்து கொண்டு தேங்காய்ப்பால் சேர்த்து மிக்சியில் அரைத்துக் கொள்ளவும். * வெல்லத்தை சிறிது தண்ணீர் ஊற்றி ஒரு கொதிவிட்டு கரைந்ததும், ஒரு உலோக வடிகட்டியில் தூசி நீங்க வடிகட்டிக் கொள்ளவும். * ஒரு வாணலி அல்லது நான்ஸ்டிக் தவாவில் தேங்காய்ப்பாலுடன் சேர்த்து அரைத்த பேரீச்சம்பழம் மற்றும் வெல்ல நீரை சேர்த்து ஒரு கொதி விடவும், * ஒரு சிட்டிகை பச்சை கற்பூரத்தை கட்டைவிரல் மற்றும் ஆட்காட்டி விரலுக்கு மத்தியில் வைத்து நன்கு நெரித்து கொதிக்கும் பாயசத்தில் போட்டு ஏலக்காய் பொடி தூவி ஒரு சிட்டிகை உப்பு சேர்த்து நன்கு கலந்து அடுப்பை அணைக்கவும். உபயோகமான குறிப்பு தேங்காய்த் துருவலை சிறிது சுடுநீருடன் சேர்த்து மிக்சியில் அரைத்து ஒரு உலோக வடிகட்டியில் போட்டு கசக்கி எடுத்து வடிகட்டிய முதல் தேங்காய்ப்பாலை உபயோகிக்க வேண்டும். சூப்பர் மார்க்கெட்டுகளில் ரெடியாகக் கிடைக்கும் தேங்காய்ப்பாலையும் உபயோகிக்கலாம். சுவைக்கான குறிப்பு ஒரு சிட்டிகை உப்பு சேர்ப்பதானது வெல்ல சுவையைத் தூக்கிக் காட்டும். வெல்லத்திற்கு பதிலாக தேவைப்பட்டால் சிறிது தேனும் உபயோகிக்கலாம். மற்ற பாயாசங்களில் இருந்து வேறுபட்ட சுவையுடன் இயற்கை இனிப்புடனும் கமகம மணத்துடனும் இருக்கும் பேரீச்சம் பழ பாயாசம் சுவையும் ஆரோக்கியம் நிறைந்தது என்றால் சரிதானே! இயற்கையின் மூலமாக இறைவன் மனிதர்களுக்கு அளித்துள்ள இனிப்புகள் பலப்பல. இயற்கை இனிப்பின் இயல்பான சுவையுடன் ஆரோக்கிய சுவையும் சேர்ந்தது பேரீச்சம்பழம். நம்முடைய முழுமையான ஆரோக்கியத்திற்கு உகந்த உயர்ந்த நார்ச்சத்து, இரும்புச்சத்து, கால்சியம், மெக்னீசியம், பொட்டாசியம், சல்பர் போன்ற மினரல்கள், வைட்டமின்கள், அமினோ ஆசிட்கள் அனைத்தையும் தன்னுள்ளே அடக்கிய சிறப்புக்குரியது பேரீச்சம்பழம். இது உணவை செரிக்க உதவி செய்கிறது. நோய் எதிர்ப்பு சக்தியை அதிகரித்து மலச்சிக்கலை போக்குகிறது. ஒரு பேரீச்சம் பழத்தில் 23 கலோரிகள் உள்ளன என்பது வரப்பிரசாதம். இயற்கையின் மற்றொரு இனிப்பு வரப்பிரசாதம் வெல்லம். எந்த விதமான ரசாயனங்களோ, பல பொருட்களின் சேர்க்கையோ உபயோகப்படுத்தாமல் இயற்கையான கரும்புச்சாறில் இருந்து தயாரிக்கப்படும் வெல்லம், இரும்புச்சத்து, கால்சியம், பாஸ்பரஸ், காப்பர் போன்ற மினரல்கள் மற்றும் மிதமான நார்ச்சத்து நிறைந்தது. நம் ரத்தத்தில் உள்ள அசுத்தங்களை நீக்கி ரத்தத்தை சுத்திகரிப்பு செய்ய வல்லது வெல்லம். தூசு தும்பு நிறைந்த இடங்களில் வேலை செய்வோர் அளவாக வெல்லத்தை உட்கொள்வதை வழக்கமாகக் கொண்டால் அவர்களுடைய மூச்சுக்குழாய் தூசியினால் அதிகம் பாதிக்கப்படாது என்கிறார்கள் சில ஆராய்ச்சியாளர்கள். ஏனெனில் மூச்சுவிடும் குழாயை சுத்தமாக்கும் சக்தி வாய்ந்ததாம் வெல்லம். இரும்புச்சத்து மிக்க வெல்லத்தை பெண்கள் உட்கொள்வது அவர்களுக்கு நன்மை பயக்கும். அதனால்தான், பூப்பெய்துவதில் இருந்து மாதவிடாய் நிற்கும் வரை அளவாக பெண்கள் வெல்லம் உட்கொள்வதை வழக்கமாகக் கொள்ள வேண்டும் என்று முன்னோர்கள் கூறி வைத்துள்ளனர் போலும். செரிமானத் தன்மையை அதிகரிக்க வல்ல ஏலக்காய் நம் ஆரோக்கியத்திற்கு மிகவும் உகந்ததும் கூட. ஏலக்காய் நம் உடலுக்கு நோய் எதிர்ப்பு சக்தி தர வல்லது. பொட்டாசியம், கால்சியம், மெக்னீசியம் போன்ற மினரல்கள் நிறைந்த ஏலக்காயில் ஓரளவிற்கு இரும்புச்சத்தும் இருக்கிறது. நாவை இனிக்க வைக்கும் இனிப்புகளான பேரீச்சம் பழம் மற்றும் வெல்லத்துடன் தன் அதிவாசனையால் மனதை ஈர்க்கும் ஏலக்காய்த் தூள் சேர்த்து இனிக்க இனிக்க பேரீச்சம்பழ பாயசம் செய்யலாம்.