ஊனத்தையும் தடுக்கும் உடற்பயிற்சி!--ஆசனம்

ஊனத்தையும் தடுக்கும் உடற்பயிற்சி!

நலம், நலமறிய ஆவல். டாக்டர் விகடன் வழங்கும் ஆரோக்கியப் பக்கம்!

மனதுக்கும், மூளைக்கும்தான் இன்று அதீத வேலை. காலை பத்து மணியில் தொடங்கி மாலை 6 மணி வரை அலுவலக சீட்டில் ஆணி அடித்தாற்போல் உட்காருவதன் விளைவு, உடல் உழைப்பு என்பதே நம்மிடம் இல்லாமல் போய்விட்டது. இதனால் போதிய உடற்பயிற்சி இல்லாமல், பல்வேறு உடல் உபாதைகளுக்கும் நாம் உள்ளாகி தவிக்கவேண்டிய நிலை! ''தினமும் உடற்பயிற்சி செய்வதால், உடலில் நோய் எதிர்ப்பு சக்தி அதிகரிக்கும். ரத்த அழுத்தம் மற்றும் சர்க்கரை நோயை கட்டுப்படுத்தும்,  மற்றவர்களிடமிருந்து இருமல், சளி, தும்மலால் வெளியேறும் வைரஸ் கிருமிகள் நம்மை அண்டவிடாமல் தடுக்கும்..!'' உற்சாகத்துக்கு வழி சொல்லும் சேலத்தை சேர்ந்த பிசியோதெரபிஸ்ட் எம்.செந்தில்குமார், உடற்பயிற்சியின் முக்கியத்துவத்தையும், அதன் தேவைகளையும் இங்கே விளக்குகிறார்.
''வயதாக ஆக நம் எலும்பில் தேய்மானம் ஏற்படும். இதனால், எலும்பில் வலிமை குறைந்து போய்விடுகிறது. தொடர்ந்து உடற்பயிற்சியின் மூலம்தான் எலும்பு தேய்மானம் அடையாமல் தவிர்க்க முடியும்.
உடற்பயிற்சி செய்வதால், எலும்பு மூட்டு மற்றும் தசை நார்கள் நன்றாக பலப்படுகிறது. தசைகளில் சுருங்கி விரியும் தன்மை அதிகரிக்கிறது. இதனால் எந்த ஒரு பொருளையும் அசால்டாக தூக்கி கையாள முடியும்.

கரடு முரடான பாதையில் நடந்து செல்லும்போது, சட்டென கால் இடறினாலும் தசை பிடிப்பு போன்ற பிரச்னைகள் பெரும்பாலும் இருக்காது.
மேலும், அலுவலகத்தில் அதிக நேரம் தொடர்ந்து பணிபுரிந்தாலும் சோர்வு என்பதே தெரியாமல், உடலின் செயல் திறன் மேம்படும்.
உடல் உறுப்பு குறைந்தால்தான் ஊனம் என்றில்லை. நடை, உடை பாவனையில் மாறுதல் ஏற்படுவதும் ஒருவித ஊனம்தான். தொடர்ந்து உடற்பயிற்சி செய்து வருவதன் மூலம் உடல் ஊனமும் தடுக்கப்படும். 
மூட்டுவலி பிரச்னையால் சிலர் அவதிப்படும்போது, ஒட்டு மொத்த உடலின் எடையும் ஒரே காலில் கொண்டு வந்து சாய்ந்தபடி, விந்தி விந்தி நடப்பார்கள்.  உடற்பயிற்சி செய்வதால், தசைநார்கள் வலிமை அடைந்து இது போன்ற பாதிப்பு வராமல் தடுத்துவிடலாம்.

உடம்பில் தேவையில்லாத கொழுப்பு வயிற்று பகுதியில் தேங்கி, தொப்பை விழுந்து விடும். தொப்பையை குறைக்க வேண்டும் என்று நினைப்பவர்கள், உடற்பயிற்சியில் ஈடுபட்டாலே போதும். இதனால், வயிறும் குறைந்து அழகிய கம்பீர தோற்றத்தை பெறமுடியும்.
புற்று நோய் திசுக்களையும் உடற்பயிற்சி கட்டுப்படுத்துகிறது. மேலும், மன அழுத்தம் மற்றும் மன இறுக்கத்தைக் குறைத்து, எந்த வேலையையும் எளிதாக செய்யக்கூடிய அளவுக்கு, உடலில் தெம்பை யும், புத்துணர்வையும் எப்போதும் தக்க வைக்கும்.’ என்றவர் 'ஜிம்’முக்கு செல்லாமலேயே உடம்பை 'ஜம்’மென்று வைத்துக் கொள்ளும் உடற்பயிற்சியை பற்றி சொன்னார்.

'தினமும் வீட்டிலேயே உட்கார்ந்து எழுவது, நடப்பது, படிக்கட்டுகளில் ஏறி இறங்குவது, சைக்கிள் ஓட்டுவது, வீட்டுத் தோட்ட வேலை, கார் கழுவது போன்ற வேலைகளே நமக்கு நல்ல உடற்பயிற்சிதான்.
உடற்பயிற்சி செய்யும் நேரத்தை படிப்படியாக அதிகரிக்க வேண்டும். ஆரம்பத்தில் எளிய பயிற்சிகளை செய்து பழகிக் கொள்ளவேண்டும். பிறகு கடினமானப் பயிற்சிகளை மேற்கொள்ளலாம்.
காய்ச்சல், உடல் நலக்குறைவு, வாந்தி, தலைச்சுற்றல், மயக்கம் இருக்கும்போது உடற்பயிற்சியில் ஈடுபடவே கூடாது