சமையல் குறிப்புகள்! உலர்பழ உருண்டை
உன்னதமிக்க உலர் பழங்கள்! பழங்களில் உள்ள நீரை வற்ற வைத்து அவற்றை உலர் பழங்களாக்குவதானது `பிரிஜ்' இல்லாமல் அவற்றை பாதுகாக்க உதவுகின்றன. அ...
https://pettagum.blogspot.com/2011/04/blog-post_5231.html
உன்னதமிக்க உலர் பழங்கள்!
பழங்களில் உள்ள நீரை வற்ற வைத்து அவற்றை உலர் பழங்களாக்குவதானது `பிரிஜ்' இல்லாமல் அவற்றை பாதுகாக்க உதவுகின்றன. அவை நீண்ட நாட்கள் கெட்டுப்போகாமல் இருக்கவும் உதவுகின்றன. சீசன்களில் மட்டும் கிடைக்கும் சீசனல் பழங்களை அவை கிடைக்காத காலங்களிலும் இம்முறையில் உலர் பழங்களாக சாப்பிட இயலும்.
புதிதாக பறித்த பழங்கள் அளவிற்கு நீர்ச்சத்து இல்லாவிடினும் மற்ற பழங்களைவிட, கலோரிகள் உலர் பழங்களுக்கு அதிகம். உலர் பழங்களின் சுவையும், மணமும் வெகு நாட்களுக்கு இருக்கும். சர்க்கரை சேர்க்காமலே இயற்கையான இனிப்பு இவற்றிற்கு இருக்கும் என்பதாலும் உலர் பழங்கள் மிகமிக உயர்வாக கருதப்படுகின்றன.
`மூர்த்தி சிறிதானாலும் கீர்த்தி பெரியது' என்பதற்கேற்ப, அளவில் சிறியதான உலர் பழங்கள் உடலுக்கு நோய் எதிர்ப்பு சக்தி தர வல்ல வைட்டமின்கள், மினரல்கள் நிறைந்தவை.
உலர் பழங்கள் வெகு எளிதில் செரிமானமாகக் கூடியவை. மற்றும் ரத்த சுத்திகரிப்பு செய்யும் சக்தி வாய்ந்தவை. நோய்வாய்ப்பட்டு தேறிவருபவர்கள் உலர் பழங்கள் உண்டால் விரைவில் இயல்பான உடல்நலத்தை அடையலாம்.
உலர் பழங்களில் பொதிந்து நிறைந்துள்ள இயற்கை இனிப்பு சுவையானது. நாவிற்கு மட்டுமின்றி உடல் ஆரோக்கியத்திற்கும் உகந்தது. தினந்தோறும் உலர் பழங்களை அளவாக உட்கொள்வதை பழக்கமாகக் கொண்டால் உடல் ஆரோக்கியம் அதிகரிக்கும் என்று ஆராய்ச்சியாளர்கள் சொல்கிறார்கள். உலர் பழங்கள் தோல் சுருக்கங்களை நீக்கி சருமத்தை பளபளக்க வைக்கும் சக்தி வாய்ந்தவை. மலச்சிக்கலை போக்க வல்லது. உலர் திராட்சை ஞாபகசக்தியை அதிகரித்து இதயத்திற்கு நன்மை விளைவிக்கக்கூடியது. வால்நட் எனர்ஜி தர வல்லது. முந்திரி புரதச்சத்து நிறைந்தது. வேர்க்கடலை நார்ச்சத்து மிகுந்தது. மினரல் சத்து நிறைந்தது பேரீச்சம்பழம்.
இவை அனைத்தையும் உபயோகித்து இம்முறை உலர் பழ உருண்டைகள் செய்து நம் நண்பர்களுக்கும், உறவினர்களுக்கும் கொடுப்போமா...!
உலர்பழ உருண்டை
தேவையான பொருட்கள்:
முந்திரி, பாதாம், உலர்திராட்சை, பிஸ்தா, வால்நட், தோலுரித்த வேர்க்கடலை சிறுதுண்டுகளாக நறுக்கியது - 1 கப்
பேரீச்சம்பழம் நறுக்கியது - 1 கப்
நெய் - 4 டேபிள் ஸ்பூன்
ஏலக்காய்த்தூள் - 1/2 டீஸ்பூன்
செய்முறை:
கனமான ஒரு வாணலியில் நெய் ஊற்றி அதில் நறுக்கிய பேரீச்சம் பழங்களைப் போட்டு மெல்லிய தீயில் கலவை ஒன்று சேர்ந்தாற்போல் வரும்வரை வதக்கவும்.
பொடியாக அரிந்த மற்ற உலர் பழங்களை ஒரு வாணலியில் மெல்லிய தீயில் சற்று வறுத்து எடுத்துக் கொள்ளவும்.
வறுத்த உலர் பழங்களை பேரீச்சம் பழக்கலவையுடன் சேர்த்து ஏலக்காய்த்தூள் சேர்த்து ஒன்றாக சேர்ந்து வரும்வரை மெல்லிய தீயில் வதக்கவும்.
ஒரு தட்டில் நெய் தடவி வறுத்த உலர் பழக்கலவையை அதில் கொட்டவும்.
மிதமான சூடு இருக்கையிலே உலர் பழக்கலவையை சிறுசிறு உருண்டைகளாக்கி கெட்டியாகப் பிடித்து வைத்து பரிமாறவும்.
சுவைக்கான குறிப்பு
தேவைப்படுவோர் உலர் பழ உருண்டைகளை கொப்பரைத் தேங்காய்த் துருவலில் போட்டு கிளறி எடுத்து வைக்கலாம். உலர் பழ உருண்டை, இயற்கை இனிப்பும், ஆரோக்கிய சுவையும் மிக்கது என்பது சரிதான்!
Post a Comment