சாக்லேட்! டேஸ்ட்டா... வேஸ்ட்டா? --- ஹெல்த் ஸ்பெஷல்

நிறைய சாக்லேட் சாப்பிட்ட குழந்தையைக் கோபத்தில் அடித்துவிட்டாள் அம்மா. யாருடைய தேற்றுதலுக்கும் பிடிகொடுக்காமல் அழுது தீர்த்தது குழந்தை. வேறு வழி இல்லை. ஒரு சாக்லேட்    நீட்டினாள் தாய். எந்த சாக்லேட்டுக்காக குழந்தையை அடித்தாளோ, அதே சாக்லேட்டை நீட்ட வேண்டிய நிலை. குழந்தைகளின் உலகத்தில் சாக்லேட் தவிர்க்க முடியாதது. த்ரிஷா முதல் டெரர் முகம் காட்டும் மிலிட்டரி ஆட்கள் வரை பலருக்கும் எச்சிலைச் சுரக்க வைக்கும் சக்தி கொண்டது... சாக்லேட்!
சாக்லேட் சாப்பிடுவதால் குழந்தைகளுக்கு நன்மையா தீமையா என்கிற கேள்வியுடன் உணவியல் நிபுணர் புவனேஸ்வரியை         சந்தித்தோம். இரண்டு சாக்லேட்டுகளை கையில் எடுத்துக் கொடுத்து அர்த்த புஷ்டியோடு பேச்சை ஆரம்பித்தார். ''குழந்தைப் பருவமும் சாக்லேட்டும் பிரிக்க முடியாதவை. சாக்லேட்டை அளவாகச் சாப்பிட்டால் அவர்களுக்கு எந்தப் பிரச்னையும் வராது. குழந்தைகள் அதிலும் குறிப்பாக, மூன்று வயதுக்கு உட்பட்ட குழந்தைகள் சாக்லேட்டுக்கு அடிமையாக விடக்கூடாது. சாக்லேட் இனிப்புச் சுவை கொண்டது. அதனால், அதன் சுவைக்கு அடிமையான குழந்தைகளுக்கு மற்ற உணவுகள் பிடிக்காது. சில குழந்தைகள் சாப்பாட்டையே வெறுப்பார்கள். இதனால், அவர்கள் உணவில் சமச்சீர் இல்லாமல் போய் இளம் வயதிலேயே பல்வேறு உடல்நலப் பிரச்னைகள் வரக்கூடும்.

குழந்தைகள் சாக்லேட் சாப்பிட்டதும் பற்களில் ஒட்டும். சாக்லேட் சாப்பிட்டதும் வாய் கொப்பளித்தால் பற்சிதைவு, சொத்தை போன்ற பிரச்னைகளைத் தவிர்க்கலாம். 10 வயதுக் குழந்தைகள் வளர் இளம் பருவத்தில் அடியெடுத்து வைக்கும்போது அடிக்கடி சாக்லேட் சாப்பிட்டால் உடல் எடை அதிகரிக்கும். பொதுவாகக் குழந்தைகளுக்கு சாக்லேட் கொடுக்கும்போது தேவையான அளவுக்கு மட்டும் வாங்கி அவ்வப்போது வாங்கியதை அப்போதே பிரித்து கொடுத்துவிடுங்கள். மொத்தமாக வாங்கி வைத்துவிட்டால் அது தீரும் வரை அவர்கள் கண்கள் அதில்தான் இருக்கும்!'' என்கிறார் புவனேஸ்வரி.
பாண்டிச்சேரியில் இருக்கும் சாக்லேட் பார்லர் 'ஸுகா’ வின் நிறுவனர் ஸ்ரீநாத் பாலசந்திரன் சாக்லெட் பற்றி மேலும் பல பயனுள்ள தகவல்களை பகிர்ந்து கொண்டார். ''ஒயிட் சாக்லேட், மில்க் சாக்லேட் மற்றும் டார்க் சாக்லேட் எனச் சாக்லேட்டுகள் மூன்று வகைகளில் கிடைக்கின்றன. டார்க் சாக்லேட் சாப்பிடக் கசப்பாக இருந்தாலும் அதுதான் உடல் நலத்துக்கு நல்லது. இதில் கோகோ நிறைய இருக்கும். ரத்த அழுத்தம் குறையும்போது இந்தச் சாக்லேட்டைச் சாப்பிட்டால் பலன் கிடைக்கும். இதில் ஆன்டி ஆக்சிடென்ட் உள்ளது. இது ஒரு கப் க்ரீன் டீயை அருந்துவதற்குச் சமம்.
சாக்லேட் வாங்கும்போது அதில் என்னென்ன சத்துக்கள் எந்த அளவு உள்ளன என்ற பட்டியல் உள்ளதா என்று பார்த்து வாங்க வேண்டும். 'சுகர் ஃப்ரீ’ என்று  குறிப்பிட்டிருந்தாலும்கூட அதில் 0.01 சதவீதம் வனிலா சேர்த்திருப்பார்கள். அது போதும் சர்க்கரை நோயாளிகளின் சர்க்கரை அளவை உயர்த்த.  கோகோவும் வெண்ணெயும் சேர்த்துத் தயாரிக்கப்பட்டதா அல்லது தாவரக் கொழுப்பில் இருந்து செய்யப்பட்டதா என்று பார்த்து வாங்க வேண்டும். கோகோ பட்டர் சாக்லேட்தான் நல்லது.''
 ஸ்வீட் எடு... கொண்டாடு!

கோக்கோ மரத்தின் விதையில் இருந்து தயாரிக்கப்பட்ட பவுடரில்தான் சாக்லெட் தயாரிக்கப்படுகிறது. இதில் கொழுப்புச் சத்து குறைவாக இருக்கும். இது பக்கவாதம் வருவதற்கான வாய்ப்பை 17 சதவீதம்வரை குறைக்கிறது. சாக்லேட்டில் ஃபிளவானோல்ஸ் (Flavanols) என்ற வேதிப் பொருளும் உள்ளது. அது ரத்தக் குழாய்களில் ரத்தம் சரளமாக ஓட உதவுகிறது. உயர் ரத்தஅழுத்ததைக் குறைக்கவும்  இதயம் சம்மந்தமான நோய்களுக்கு எதிர்ப்பு மருந்தாகவும் இருக்கிறது. அளவோடு சாப்பிட்டால் அளவில்லா நன்மைகள்!