சத்து குறைபாடுதான் காரணமா?---ஹெல்த் ஸ்பெஷல்,
சத்து குறைபாடுதான் காரணமா? ''தற்போது ப்ளஸ் டூ படிக்கும் என் மகள், பூப்படைந்ததிலிருந்தே அடிக்கடி மாதவிலக்கு சுழற்சியில் தடுமாற்ற...
https://pettagum.blogspot.com/2012/08/blog-post_8806.html?m=0
சத்து குறைபாடுதான் காரணமா?
''தற்போது ப்ளஸ் டூ படிக்கும் என் மகள், பூப்படைந்ததிலிருந்தே அடிக்கடி மாதவிலக்கு சுழற்சியில் தடுமாற்றமும் அவ்வப்போது அதிகப்படியான போக்கையும் சந்திக்கிறாள். எந்த டாக்டரை சந்தித்தாலும் பலவிதமான டெஸ்டுகள் எடுத்துப் பார்த்துவிட்டு, 'சத்துக்குறைபாடுதான்' என்றபடி இரும்புச்சத்து டானிக் மற்றும் சத்தான ஆகாரத்தைப் பரிந்துரைக்கிறார்கள். ஆனாலும் பலன் கிடைத்தபாடில்லை. மகளுடைய மாதவிலக்கு சுழற்சியை இயல்பாக்கவும், பரிபூரண பெண்மைக்குரிய சத்துக்கள் உடலில் சேரவும் அவளுக்கான உணவு முறைகளை சீரமைக்க விரும்புகிறேன். பக்கவிளைவுகள் அற்ற பாரம்பரிய உணவூட்டத்தில் அதற்கான வழிமுறைகளைத் தர முடியுமா?''
- பாக்கியம் செல்வக்குமார், மயிலாடுதுறை
டாக்டர் அன்பரசு, அரசு சித்த மருத்துவர், கிருஷ்ணராயபுரம் (கரூர்):
''மாதவிலக்கு முடியும் நாளில், இரும்புச்சத்து இழப்பை இளம் பெண்கள் அதிகமாக உணர்வார்கள். இதை இரண்டே நாளில் சரி செய்ய முருங்கைக்கீரை உதவும். மாதவிலக்கு நாட்களில் தருவது என்றில்லாது, வாரத்தில் குறிப்பிட்ட நாட்களில் முருங்கைக்கீரையை மகளுக்குப் பிடிக்கும் வகையில் உண்ணத் தரலாம். உங்களுக்கு பொருந்தும் எனில், வழக்கமான முருங்கைக்கீரை சமையலில் முட்டை சேர்த்துத் தருவது கூடுதல் பலனைச் சேர்க்கும். கீரைகளில் பொன்னாங்கண்ணி, புளிச்சக்கீரை போன்றவையும் இரும்புச்சத்து இழப்பை நிவர்த்தி செய்யும்.
பெண்களின் கர்ப்பப்பைக்கு வலுவூட்ட, உளுத்தங்களி செய்து தரலாம். கேழ்வரகு களியும் நல்லது. மைக்ரோ நியூட்ரியன்ஸ் அதிக இரும்புச்சத்து கொண்ட சிறுதானியங்களை அதிகளவு உணவில் சேருமாறு பார்த்துக்கொள்ள வேண்டும். முளைவிட்ட நவதானியங்கள் சேர்த்து தயாரிக்கப்படும் சத்துமாவு கஞ்சி காலையில் சாப்பிட பொருத்தமானது.
அன்றாடம் சாப்பிடும் ஸ்நாக்ஸ் உள்ளிட்ட தின் பண்டங்களுக்கு பதிலாக, பேரீச்சம்பழம், வெல்லம் கலந்த வீட்டுப்பண்டங்களை தரலாம். அதிலும் பனைவெல்லம் மிகச்சிறந்தது. எள் மிட்டாய் மாத சுழற்சி தடுமாற்றத்தை ஒழுங்காக்கும். குமார பருவத்தினருக்கு இயல்பாகவே அதிகமாக இருக்கும் உடற்சூடு, மாதாந்திரப் போக்கை தடுமாற செய்யும் என்பதால்... உடல் உஷ்ணத்தை மட்டுப்படுத்தும் வகையிலும் வாழ்க்கைப் போக்கையும் உணவூட்டத் தையும் சீரமைப்பது நல்லது. வாரத்தில் இருநாள் எண்ணெய் தேய்த்து குளிப்பது, இரவு படுக்கும்போது வயிற்றில் சிறிதளவு விளக்கெண்ணெய் தேய்த்துக்கொள்வது, இவற்றோடு இரவுகளில் தூக்கத்துக்கு பங்கம் வராது பார்த்துக் கொள்வதும் நல்ல பலன் கொடுக்கும்.''
Post a Comment