நிலவேம்புக் குடிநீர் என்கிற அருமருந்து...காய்ச்சலுக்கு மட்டுமல்ல... எக்கச்சக்க பலன்கள் தரும் !

நிலவேம்பு... டெங்குக் காய்ச்சல் தீவிரமடைந்ததை அடுத்து எங்கு பார்த்தாலும் நிலவேம்பின் பெயர் அடிபடுகிறது. Andrographis paniculata என்ற தாவர...

நிலவேம்பு... டெங்குக் காய்ச்சல் தீவிரமடைந்ததை அடுத்து எங்கு பார்த்தாலும் நிலவேம்பின் பெயர் அடிபடுகிறது. Andrographis paniculata என்ற தாவரவியல் பெயர் கொண்ட நிலவேம்பு கசப்புச் சுவையுடனும் வெப்பத்தன்மையுடனும் உள்ளது. இன்றைக்கு டெங்கு உள்ளிட்ட காய்ச்சலைக் குணப்படுத்தத் தரப்படும் நிலவேம்புக் குடிநீர் என்பது வெறும் நிலவேம்பினால் மட்டும் தயாரிக்கப்பட்டதல்ல. அதில் ஒன்பது வகையான மூலிகைகள் சேர்க்கப்பட்டுள்ளன. அதுபற்றி நம்மிடம் விளக்கமாகச் சொன்னார் சென்னை அறிஞர் அண்ணா அரசினர் இந்திய மருத்துவமனையின் மருந்து செய் நிலைய உதவி மருத்துவ அலுவலர் டாக்டர் ஜி.முத்துலட்சுமி.

நிலவேம்புக் குடிநீர் தயாரிக்கப் பயன்படுத்தப்படும் பொடியில் நிலவேம்புடன் சுக்கு, பற்பாடகம், வெட்டிவேர், விலாமிச்சை வேர், கோரைக்கிழங்கு, பேய்ப்புடல், மிளகு, சந்தனம் உள்ளிட்ட மூலிகைகள் சேர்க்கப்படுகின்றன.பொதுவாக வெறும் நிலவேம்பு இலைகள் அல்லது அதன் வேர் அல்லது முழுத் தாவரத்தையும் கொதிக்க வைத்து குடித்து வந்தாலே காய்ச்சல் குணமாவதுடன் நோய் எதிர்ப்புச் சக்தி அதிகரிக்கும். மேலும் கல்லீரல் தொடர்பான நோய்கள், பசி மந்தம், சொறி சிரங்கு போன்றவற்றைக் குணப்படுத்தும் சக்தி வாய்ந்த ஒரு மூலிகை. தலையில் நீர் கட்டுதல், தலைவலி, தும்மல், இருமல் போன்றவற்றையும் குணப்படுத்தக்கூடியது. தைராய்டு, கர்ப்பப்பைக் கட்டிகளையும் நிலவேம்பு குணப்படுத்தும்.

நிலவேம்பின் பயன்கள் ஒருபுறமிருக்க அதில் சேர்க்கப்படும் சுக்கு நல்லதொரு வலிநீக்கி. உலர்ந்த இஞ்சியே சுக்கு. பொதுவாக தலைவலி வரும் நேரங்களில் சுக்கை நீர்விட்டு இழைத்து நெற்றியில் பற்று போட்டு வந்தால் அடுத்த சில நிமிடங்களில் குணமாகும். சுக்குடன் தனியா, மிளகு, ஏலக்காய் சேர்த்து பொடியாக்கி தண்ணீர் விட்டு கொதிக்க வைத்து பனைவெல்லம் சேர்த்துக் குடித்தால் மூக்கடைப்பு, சளித்தொல்லை விலகுவதுடன் உடல் அசதி, சோர்வு நீங்கி சுறுசுறுப்பு ஏற்படும். சுக்கு, மிளகு, பூண்டு, வேப்பிலை சேர்த்துக் கசாயமாக்கி தினமும் மூன்றுவேளை வீதம் இரண்டு நாள்கள் குடித்து வந்தால் விஷக்காய்ச்சல் குணமாகும்.

அடுத்தது பற்பாடகம்... இது சித்த மருத்துவத்தில் பயன்படுத்தப்படும் ஒரு மூலிகை. குறிப்பாக குடிநீரில் இது பயன்படுத்தப்படுகிறது. நாட்டு மருந்துக்கடைகளில் கிடைக்கும் இந்தப் பற்பாடகத்தை நன்றாகச் சுத்தம் செய்து தண்ணீரில் கழுவி ஐந்து கிராம் அளவு எடுத்து அதை அம்மியில் வைத்து அரைத்து மோரில் கலந்து குழந்தைகளுக்குக் கொடுத்து வந்தால் சீதபேதி, காய்ச்சல் கட்டுக்குள் வரும். பற்பாடகத்தின் பசுமையான இலைகளைப் பால் விட்டு அரைத்து தலையில் தேய்த்துக் குளித்து வந்தால் கண் பார்வை சீராவதுடன் உடல் நாற்றம், சூடு தணியும்.

நிலவேம்புக் குடிநீர் பொடியுடன் வெட்டிவேரும் சேர்க்கப்பட்டுள்ளது. புல் வகையைச் சேர்ந்த இந்தத் தாவரம் இந்தியாவைத் தாயகமாகக் கொண்டது. இது குளிர்ச்சி தருவதுடன் நறுமணம் மற்றும் உற்சாகத்தைத் தரக்கூடியது. வெட்டிவேரை நன்றாக உலர்த்திப் பொடியாக்கி 200 மி.லி முதல் 400 மி.லி அளவு தண்ணீரில் ஊறப்போட வேண்டும். ஊறிய அந்த நீரை 30 மி.லி முதல் 65 மி.லி அளவு குடித்து வந்தால் காய்ச்சல் மற்றும் வயிற்றில் ஏற்படும் நோய்கள் கட்டுப்படும். வெட்டி வேரால் செய்யப்படும் விசிறியைக் கொண்டு வீசி வந்தால் உடல் எரிச்சல், தாகம் நீங்குவதுடன் மனமகிழ்ச்சி ஏற்படும்.

விலாமிச்சை வேர் மணமுள்ளது மட்டுமல்ல மிகவும் குளிர்ச்சி நிறைந்தது. இதனால் முடி கொட்டுதல் பிரச்னை நீங்கி தலைமுடியை வளரச் செய்யவும் தயாரிக்கப்பட்டு எண்ணெயில் விலாமிச்சை வேர் சேர்க்கப்படுகிறது. மேலும் வெயில் காலத்தில் ஏற்படும் வெப்ப நோய்களை விரட்டக்கூடியது. மண்பானைத் தண்ணீரில் வெட்டிவேருடன் விலாமிச்சை வேரையும் சேர்த்து அருந்தி வந்தால் தாகம் தீர்ப்பதுடன் கோடை நோய்கள் குணமாகும்.

கோரைக் கிழங்கு சிறுநீர், வியர்வையைப் பெருக்குவதுடன் உடல் பருமனைக் குறைக்க உதவும். கோரைக்கிழங்கை பாலுடன் சேர்த்து அரைத்துப் பசையாக்கி தலையில் பூசினால் ஞாபகசக்தி அதிகரிக்கும். வலிப்பு நோய் மற்றும் காய்ச்சல் போன்றவை குணமாகும். கோரைக் கிழங்குப் பொடியை அரை டீஸ்பூன் வீதம் காலை மற்றும் இரவு உணவுக்கு முன் பால் அல்லது தேனில் கலந்து சாப்பிட்டு வந்தால் ரத்த அழுத்தம், வயிற்றுப்போக்குக் குணமாகும்.

பேய்ப்புடல் காய்ச்சலைத் தணிக்கக்கூடியது. இதன் இலைகளை அரைத்து மேல்பூச்சாக பூசினால் தலையில் திட்டுதிட்டாக முடி உதிர்ந்து வழுக்கை விழச்செய்யும் புழுவெட்டு பிரச்னை குணமாகும். பேய்ப்புடல் இலைகளை மையாக அரைத்து தோல் நோய்களின் மீது பூசி வந்தால் எக்ஸிமா எனப்படும் தோலில் நீர் வழியும் கொப்பளங்களோடு கூடிய நமைச்சல் விரைவில் குணமாகும். பேய்ப்புடல் இலைகளைத் தண்ணீர் விட்டு கொதிக்க வைத்து வடிகட்டி ஆறாத புண்கள், நாற்றமெடுத்து புழு வைத்த புண்கள், சர்க்கரை நோயால் வந்த கட்டிகள் போன்றவற்றின்மீது ஊற்றி வந்தால் விரைவில் குணமாகும்.

நிலவேம்புக் குடிநீர் பொடியில் மிளகுக்கும் ஓர் இடம் உண்டு. இதில் கால்சியம், பாஸ்பரஸ், இரும்பு போன்ற சத்துகளும் தயாமின், ரிபோபிளேவின், ரியாசின் போன்ற வைட்டமின்களும் நிறைந்திருக்கின்றன. மிளகைப் பொடித்து தேனுடன் கலந்து சாப்பிட்டு வந்தால் மூக்கு ஒழுகுதல் மற்றும் சளித்தொல்லைகள் அகலும். சளித்தொல்லை உச்சத்தில் உள்ளவர்கள் மிளகை நெய்யில் வறுத்துப் பொடித்து அதில் அரை டீஸ்பூன் வீதம் மூன்று வேளை சாப்பிட்டு வந்தால் குணமாகும். தலைவலி, தலைபாரம் இருந்தால் மிளகுடன் வெல்லம் சேர்த்து காலையும் மாலையும் சாப்பிட்டு வந்தால் அவை சரியாகும்.

சந்தனமும் காய்ச்சலுக்கு அருமருந்தாகச் செயல்படுகிறது. சந்தனத்தூள் அரை டீஸ்பூன் எடுத்து அரை டம்ளர் தண்ணீர் விட்டு பாதியாகும் அளவு காய்ச்சி வடிகட்டி 50 மி.லி அளவு மூன்று வேளை குடித்தால் காய்ச்சல் குணமாகும். அரை டீஸ்பூன் சந்தனத்தூளை அரை லிட்டர் தண்ணீர் சேர்த்துக் காய்ச்சி குடித்து வந்தால் சிறுநீர் கழிக்கும்போது ஏற்படும் எரிச்சல் குணமாகும். சந்தனத்தூள் இரண்டு டீஸ்பூன் எடுத்து அரை லிட்டர் தண்ணீர் விட்டு காய்ச்சிக் குடித்து வந்தால் ரத்த மூலம் குணமாகும்.

ஆக, நிலவேம்புக் குடிநீர் செய்யும் பொடியில் சேரக்கூடிய ஒவ்வொரு பொருளுக்கும் ஒவ்வொரு மருத்துவக் குணங்கள் உள்ளன. இவற்றை ஒன்றிணைத்து குடிநீராகச் செய்து அருந்தி வருவதன்மூலம் டெங்கு உள்ளிட்ட காய்ச்சல்கள் குணமாவதுடன் உடல்வலி, சோர்வு நீங்கி உற்சாகம் கிடைக்கும் என்பதில் சந்தேகமில்லை.''

Related

ஹெல்த் ஸ்பெஷல் 1750754055082787575

Post a Comment

Find Here

Date & Time

No. of Posts

Follow Pettagum on Twitter

Follow pettagum on Twitter

Counter From Jan 15 2011

Try this

Total Pageviews

Contributors

Popular Posts

Blog Archive

Followers

Cloud Labels

30 நாள் 30 வகை சிறுதானிய உணவுகள் 30 நாள் 30 வகை சமையல் E-BOOKS GOVERNMENT LINKS Greetings WWW-Service Links அக்கு பிரஷர் சிகிச்சை முறைகள். அடை வகைகள். அமுத மொழிகள் அழகு குறிப்புகள். ஆசனம் ஆப்பிள் சிடர் வினிகர் ஆரோக்கியம் காக்கும். ஆயுர்வேத மருத்துவம் ஆறு சுவையும்... அஞ்சறைப் பெட்டியும்... இஃப்தார் நோன்பு ஸ்பெஷல் இந்த நாள் இனிய நாள் இந்தியா நமது தேசம்! தேசத்தின் நேசம் காப்போம்!! இய‌ற்கை மருந்துகளின் ஆயுள்காலம் இய‌ற்கை வைத்தியம் இன்ஷூரன்ஸ் இஸ்லாமிய உணவுகள். ஈஸியா பேசலாம் இங்கிலிஷ்! உங்களுக்கு உதவும் சட்டங்கள் உடலுக்கு வலிவு தரும் சூப்கள் உடற்பயிற்சி உணவே மருந்து உபயோகமான தகவல்கள் ஊறுகாய்கள் ஃபண்ட் முதலீடுகள் கணிணிக்குறிப்புக்கள் கல்வி வழிக்காட்டி கவிதைத்துளிகள் கன்சல்ட்டிங் ரூம் காய்கறிகளின் மருத்துவ குணங்கள் கால்நடை வளர்ப்பு கால்நடைகளுக்கான இயற்கை மருத்துவம் காளான் வளர்ப்பு குழந்தைகள் நலம்! குழம்பு வகைகள் குளிர் பானங்கள் கை மருந்துகள் சட்னிகள் சமையல் அரிச்சுவடி சமையல் குறிப்புகள் சமையல் குறிப்புகள்-அசைவம்! சமையல் குறிப்புகள்-சைவம்! சமையல் சந்தேகங்கள்-கேள்வி-பதில் சர்க்கரை நோயைக் கட்டுப்படுத்தும் உணவுகள் சித்த மருத்துவம் சிறுதானிய உணவுகள் சுற்றுலா சூரணம் சேமிப்பின் சிறப்பு டெங்குக் காய்ச்சல். தமிழகத்தின் சுற்றுலா தளங்கள் தமிழால் இணைவோம் தமிழ்ப் பழமொழிகளும் சொலவடைகளும் தாய் சேய் நலம்! துவையல்கள் நாட்டு மருந்துகளின் பெயர்கள் நாட்டு வைத்தியம் நாட்டுப்புறப் பாடல்கள். நில அளவுகள் அறிவோம் நீங்களும் பிசினஸ்மேன் ஆகலாம் நீதி நூல்கள் பச்சடிகள் பலவிதம் பரீட்சை சுலபமாக பழங்களின் பயன்கள் பாட்டி வைத்தியம் பிசிஓஎஸ் பிரச்னை குணமாகும் பிசினஸ் ஸ்பெஷல் புகைப்படங்கள் பூக்களின் மருத்துவக் குணங்கள் பெட்டகம் சிந்தனை பெண்களுக்கான நோய்களும் இயற்கை மருத்துவமும் பேலியோ டயட் பொடி வகைகள் மசாலா பால் மண்ணில்லாமல் பசுந்தீவனம் வளர்ப்பு மரம் வளர்ப்போம் மருத்துவ டிப்ஸ் மருத்துவ டிப்ஸ் வீடியோ பதிவுகள் மருத்துவக் குணம் நிரம்பிய உணவுகள் மன நலம்! முகவரிகள். மூலிகை சமையல் மூலிகைகள் கீரைகள் மைக்ரோ கீரைகள் ரிலாக்ஸ் ப்ளீஸ் வங்கியில் பல வகை கடன்கள் வடாம் வகைகள் வத்தல் வகைகள் வரலாற்றில் ஒரு ஏடு வருமான வரி விவசாயக்குறிப்புக்கள் விஷப்பூச்சிகள் கடிக்கு இயற்கை வைத்தியம் வீடியோ பதிவுகள் வீட்டிலிருந்தே சம்பாதிக்க வீட்டுக்குறிப்புக்கள் வேலை வாய்ப்புகள் ஜூஸ் வகைகள் ஷாப்பிங் போகலாமா..? ஹெல்த் ஸ்பெஷல் ஹோமியோபதி மருத்துவம்
item