கற்போம் யோகா!---ஆசனம்,

'யுஜ்’ என்ற வடமொழிச் சொல்லில் இருந்துதான் 'யோகா’ என்ற சொல் பிறந்தது. 'யுஜ்’ என்றால் மனம், உடல் மற்றும் ஆன்மாவின் ஒன்றிணைப்பு என்று பொருள். ''இயல்பாக நமக்குள் இருக்கும் அமைதியை வெளிக்கொண்டு வருவது யோகா. உடலால், மனதால், வாக்கினால் நாம் தாக்கப்படும்போது நிலைகுலைந்து போகாமல் காக்கக் கூடிய கவசம் இது. ஆஸ்துமா, தைராய்டு, சர்க்கரை நோய், உயர் ரத்த அழுத்தம், மன அழுத்தம் போன்ற பலவித நோய்களை நிச்சயமாக யோகாவினால் குணப்படுத்த முடியும்!''  நம்பிக்கை மேலிடச் சொல்கிறார் 'கிருஷ்ணமாச்சார்யா ஹீலிங் அண்ட் யோகா ஃபவுண்டேஷன்’ நிறுவனர் மேனகா தேசிக்காச்சார்.
கிருஷ்ணமாச்சார்யாவின் நேரடி சிஷ்யை இவர். யோகக் கலையை இந்தியாவில் மட்டுமின்றி வெளிநாட்டினருக்கும் உணரச் செய்த கிருஷ்ணமாச்சார்யாவின் மகன் தேசிகாச்சார்யாவின் மனைவி.
யோகா பயிற்சி நிலையங்கள் வீதிக்கு வீதி க்யூ கட்டும் நிலையில், எது சரியான யோகா என்பதை இதழ்தோறும் பேச இருக்கிறார் மேனகா தேசிக்காச்சார்...
'உடலையும் மனத்தையும் ஒருமுகப்படுத்துவது யோகாசனம். நோய்களைத் தீர்க்கும் சிகிச்சை முறையாகவும் யோகா பயனளிக்கிறது. உதாரணத்துக்கு ஆஸ்துமா. யோகாவினால் ஆஸ்துமாவை எப்படிக் குணப்படுத்த முடியும் என்பதை இந்த இதழில் பார்ப்போம்.
ஆஸ்துமாவால் அவதிப்படுபவர்கள் தாங்கள் மேற்கொள்ளும் சிகிச்சை முறைகளைத் தொடர்ந்துகொண்டே, கூடுதலாக யோகாவும் செய்து வந்தால், உடல் நலத்தில் விரைவான முன்னேற்றம் காணலாம்.

யோகா மற்றும் மூச்சுப்பயிற்சியுடன் தினமும் நடைப்பயிற்சிக்கும் உணவுக் கட்டுப்பாட்டுக்கும் முக்கியத்துவம் கொடுத்தால் ஆஸ்துமா மட்டுப்படும். ஆஸ்துமா என்று இல்லை. எந்த நோயாக இருந்தாலும் அதை யோகா மூலமாகக் குணப்படுத்த வேண்டுமானால், சம்மந்தப்பட்டவரின் வயதையும் கணக்கில் எடுத்துக்கொள்வது அவசியம்.
வயதானவர்களால், எளிதாக யோகா பயிற்சிகளைப் பின்பற்ற முடியாது. முக்கியமாக மூச்சை இழுத்து விடுவது அவர்களுக்கு மிகவும் கடினமாக இருக்கும். அத்தகைய நோயாளிகள் தேர்ந்த யோகா ஆசிரியர்கள் சொல்லும் சில நுட்பமான மாற்றங்களைக் கருத்தில் எடுத்துக்கொண்டு அதன்படி ஆசனங்களைச் செய்ய வேண்டும்.
யோகக் கலையின் முக்கியத்துவமே மூச்சுப் பயிற்சியில்தான் அடங்கி இருக்கிறது. நம்முடைய சுவாசம் சீராகும்போது உடலின் இயக்கங்கள் சீராகும். இதனால், உடலின் அனைத்து உறுப்புகளும் வலிமை பெறும். மூச்சுப் பயிற்சி என்பது குறிப்பிட்ட கால அவகாசத்தில் மூச்சை உள்ளே இழுத்து, பின் வெளியே விடுவது. மூச்சை ஒரு நிமிடம் உள்ளே இழுத்தால், வெளியே விடும்போது கூடுதலாக இரண்டு நிமிடங்கள் எடுத்துக்கொள்ள வேண்டும். யோகா ஆசிரியரிடம் முறையாகப் பிரணாயாமம் கற்றுக்கொண்டு செய்வதே நலம். ஆஸ்துமா நோயாளிகள் குறைந்தது தினம் 10 நிமிடமாவது மூச்சுப் பயிற்சி மேற்கொண்டால், ஆஸ்துமா நோய் கட்டுப்படும்.
ஆஸ்துமா நோயாளிகள் மேலும் சில விஷயங்களையும் கவனத்தில் கொள்ள வேண்டும். இரவில் குளிர்ச்சியான உணவுகளைச் சாப்பிடக் கூடாது. குளிர்ச்சியான உணவு நுரையீரலின் சுவாசப் பாதையைச் சுருங்க வைக்கும். அதனால், மூக்கடைப்பு ஏற்படலாம்.
ஆஸ்துமா நோயாளிகள் வளர்ப்புப் பிராணிகளிடம் நெருங்கக் கூடாது. வீட்டில் தூசி அதிகம் இருத்தல், போர்வை தலையணையில் அழுக்கு இருத்தல் போன்றவையும் அடுப்புப் புகை, சிகரெட் புகை போன்றவையும் ஒவ்வாமையை ஏற்படுத்தலாம். மனச் சோர்வுகூட ஆஸ்துமாவுக்கு முக்கியக் காரணம்.
ஆஸ்துமா பிரச்னையால் அவதிப்படுபவர்கள் வீரபத்ராசனம் செய்யலாம்.  அதாவது, இடது காலை முன்வைத்து நேராக நிற்க வேண்டும். மூச்சை மெதுவாக உள் இழுத்தவாறு கைகளைத் தூக்கியபடி தரையில் உட்காருவது போல நினைத்துக் கொண்டு கால் முட்டியை முடிந்தவரை மடக்க வேண்டும். அதன் பிறகு மூச்சை வெளியே விட்டபடி கைகளைக் கீழே இறக்கியபடி, கால் முட்டியை நேராகப் பழைய நிலைக்குக் கொண்டுவர வேண்டும். இப்படி 6 முறைகள் செய்வது பலன் தரும்.
ஆஸ்துமா இருப்பவர்கள் பொதுவாக கூன் போட்டுத்தான் உட்காருவார்கள். கூன் நிமிர்வதற்கும் நெஞ்சு விரிவதற்கும் ஆசனங்களைக் கற்றுக்கொடுக்க வேண்டும். ஆஸ்துமா நோயாளிகள் த்விபாதபீடம் மற்றும் மஹாமுத்ரா ஆகிய இரண்டு ஆசனங்களைச் செய்யலாம். இவை உதாரணத்துக்காக மட்டுமே சொல்லப்பட்டவை. இதனுடன் தொடர்புடைய மேலும் சில ஆசனங்களைத் தகுந்த ஆசிரியரிடம் முறையாகப் பயின்று தினமும் செய்துவந்தால் ஆஸ்துமாவில் இருந்து விடுதலை பெறலாம்.''

மாடல்:  மானஸி

யோகா கற்றுக்கொள்ள வருபவர்களின் உடல் எத்தகையது, அவர்களின் வயது, உடல் எடை போன்றவற்றைக் கருத்தில்கொண்டே யோகா பயிற்சி அளிக்கப்பட வேண்டும். 'இந்த ஆசனம் செய்தால் இந்த நோய் குணமாகிவிடும்’ என்று பொதுப்படையாகச் சொல்லிவிட முடியாது. நோயின் தன்மை, அதன் தாக்கம் என்பன எல்லாம் நோயாளிகளை நேரில் பார்த்துத்தான் தெரிந்துகொள்ள முடியும். முறையான யோகா பயிற்சியாளர்களின் வழிநடத்துதலின்படிதான் ஆசனங்களைச் செய்ய வேண்டும். எந்த அளவு மூச்சை உள்ளடக்க வேண்டும், எவ்வாறு மூச்சை வெளியே விட வேண்டும் என்பதை எல்லாம் படித்தோ டி.வி.யில் காட்சியாகப் பார்த்தோ தெரிந்துகொள்ள முடியாது. இந்தக் கட்டுரைத் தொடரின் மூலம், வியாதிகளுக்கு யோகாவினால் கிடைக்கக்கூடிய தீர்வுகளைப் பற்றிப் பேச இருக்கிறோம். அவ்வளவே!